السبت، 23 يونيو، 2012

دقة هون - رموش الست

بسم الله نفتتح الطبخة


مشنة الطلبات:

  • هنبدأ بكوباية سكر بودرة. سكر ناعم وجميل يخلي الحلو يطلع لوز.

  • بعد كده هنجيب 1/3 كوباية دقيق سميد - اللي هو نفس دقيق البسبوسة – و3 ½ كوباية دقيق جميع الاستخدامات (اول بيربوس). بس خلينا نمشي ع المقادير لأن البسبوسة ساعات بتطلع معايا حجر .. آه والله  وبكسرها ع الحيطة. يا دي كسوفي منكم .. معلش انتم إخواتي وأحب أفضفض لكم كل وقت والتاني.

  • معلقة زبدة واحدة بحرارة الأوضة .. مش حرارة أوضة الساونا .. أهي أي أوضة والسلام .. عارفاكي .. أوعي حسك عينك.

  • 3 بيضات حلوين كده وفرش. خلينا متفقين إننا بنكسر البيض بره الطبخة الأول عشان لو واحدة ممششة يا أختي ولا حاجة منبقاش بوظنا الطبخة على حبة ملح.

  • فانيليا بيضة شاهقة البياض.

  • بعد كده 1/2 معلقة بيكنج باودر. سكر باودر وبيكنج باودر مش ملاحظين الباودر كتيرة شوية. الظاهر... ولا بلاش.

  •  كمان 1/2 كوباية جوز هند ناعم. أوعي تزعلي مني يا ست هند .. بيزنس إز بيزنس.



العمايل:

  1. نتوكل على الله ونبتدي. طبعاً حابة أقول إن وقت تحضير الرموش ع البارد 30 دقيقة أما دخول الفرن 20 دقيقة يعني كله على بعضه حوالي ساعة. مش كتير يعني على أكلة هتطلع حلوة بإذن الله .. أدعوا معايا.
  2. طيب.. هنضرب السكر مع الزبدة بالمضرب الكهربا أو بالإيد - لو ناوية تربي عضلات – لغاية أما يبقى هايش كده وكريمي عامل زي السحاب الأبيض.
  3. هينزل البيض والفانيليا يؤانسوهم ويتضربوا معاهم بالمرة.
  4. شويتين ونحط دقيق البسبوسة (السميد مش السميط) وبعدين جوز الهند ونضربهم معاهم برضه. إشمعنى ضربنا اللي نزلوا قبليهم يعني خلينا حقانيين.
  5. في قروانة تانية نحط البيكنج والدقيق الأبيض وبعدين ننزلهم تدريجياً (يا واش يا واش يا مرجيحة) ع القروانة أختها إلي فيها بقية المكونات لغاية أما تتحول كلها – بقدرة قادر كده – لعجينة حلوة وماسكة بعضيها نقدر نشكلها كويس.
  6. هنعمل العجينة على شكل كور أو صوابع (يعني هتبقى رموش بس تخينة حبتين) ونرصها بعيد عن بعض – بلاش الزيادة السكانية ف ديه كمان – في صينية الفرن. ندهن الصينية بشوية سمنة صغيرين قبل ما نحط الرموش عشان متلزقش ويطلع كله على فاشوش.
  7. زي ما قلنا هنحطها في الفرن على درجة 180 لغاية أما تبقى دهبي كده وتحمر وبعدين نخرجها بالسلامة وطششششششش ندلق عليها الشربات البارد أول ما تطلع. لو بقى حضرتك اتلكعتي شوية ع بال ما افتكرتي تحطي الشربات مش مشكلة يبقى سخني الشربات. يعني واحد ساقع والتاني سخن عشان يتغلغل الشربات وتبقى الرموش ناعمة كما الحرير وتتكسر وانتي بتمسكيها وتاكليها .. بس كده.
  8. يحضرني كوبليه من أغنية حليم "أنا كل ما أقول التوبة" وأنا في اللمة الحلوة ديه معاكم وأنصحكم تغنوها عشان تطلع الرموش حلوة كمان زي صوته – الله يرحمه – يقول حليم: يا رموش قتالة وجارحة يا بوي .. وعيون نيمانة وسارحة يا عين. وبالهنا والشفا يا بوي.

هناك 6 تعليقات:

yasser يقول...

لو أمي شافت الموضوع دا راح تكتبه هوا لأنها بتحب كل برامج الوجبات والحلويات

أنا هانسخه على الجهاز عشان تقرأه

Salma Hesham Fathey يقول...

أ. ياسر

أكيد طبعا انسخه .. واتفضله :)

والبوست اللي تحته عن المسقعة كمان لو حابب تنسخه برضه

شكرا جزيا لك ..

نيسآان يقول...

عجبني الاسم اولاً ...رموش الست أول مره اسمع الاسم !!!
وتانيا عجبتني الوصفه والشكل النهائي باين عليها لذيذه مع الشاي خصوصا ...حجربها ان شاء الله لما افضى:)
تسلم ايديكِ.

richardCatheart يقول...

حلو اووووووووووووووووووووى


بجد تيلم ايدك

Salma Hesham Fathey يقول...

أختي العزيزة نيساآن،

سعيدة جدا بمرورك وآسفة للرد المتأخر.

سعيدة إنك إن شاء الله هتجربي الوصفة ويا رب تعجبك ..

رموش الست وصفة أصلها مصري، يمكن عشان كده اول مرة تسمعي عنها، المهم يا رب تعجبك بقى وسلم إيديكِ على وصفاتك الغير شكل :)

Salma Hesham Fathey يقول...

richardCatheart

اسفة ع الرد المتأخر.

مبسوطة قوي إن الوصفة عجبتك

وأنتي بقى اللي حلوووووووووووة قوي ..

ربنا يخليكي :)