Powered By Blogger

الخميس، 21 يونيو 2012

دقة هون - طاجن المسقعة

حابة أشكر المدونة العزيزة نيساآن لإنها شجعتني أحط الوصفات اللي عندي ..
يا رب الوصفة تعجبكم .. وبالهنا والشفا مقدما :))
جمعة مباركة إن شاء الله
----------------------------------------------------------
خضرة يا خضيرة
كلمي سيدك
بالبصلة و الرغيف في أيدك
طعامة الشهد فيكي
مين داقك ما يسليكي
مشنة عيش ما تقضيكى
بالصلاةُ على النبي
شهقة طويلةةةةةةةةةةة و طشششششش

طاجن المسقعة



بسم الله نفتتح الطبخة
مشنة الطلبات:
  • أول حاجة الباذنجان مسقعة والمسقعة باذنجان والشيء لزوم الشيء. هنجيب 2 كيلو باذنجان رومي من السوق – اللي هو الباذنجان الكبير مش بتاع المحشي .. تمام كده عشان نبتدي على مايه بيضة- الحبة تكون حلوة وطازة كده وبتلمع ومنظرها يشرح القلب الحزين.
  • تاني هام .. البصل .. هو طبعاً مكون أصلي ف الطبخات المصرية .. محدش بيحبه وهو صاحي وشراني لكن بعد أما يتطبخ مممممممم أحلى طعم ف الدنيا. فحلين بصل متوسطين .. أو بصلاية كبيرة ونقطعها تحت الحنفية عشان دموعك يا آمال.
  • الزيت اللي هنقلي فيه الباذنجان في حلة غويطة شويتين. 
  • بطرمان .. برطمان الاتنين ليهم مدلول واحد. خلينا نقول برطمان صلصة طماطم. طبعاً زمان الست من دول كانت تقعد تعصر القوطة (كلمة إسكندراني أساساً) بايديها وتعمل منها الصلصة. اليومين دول الوضع اختلف لأن بالإضافة لغلبة عصر حبات الطماطم واحدة واحدة .. كانت الصلصة بتخرب بسرعة ولازم تستخدمها ست البيت على طول قبل ما تبوظ فالتطور الطبيعي ليها دلوقتي هو برطمان الصلصة الحمراء.
  • شوية تحابيش بقى من شاكلة رشة ملح، رشة فلفل (لزوم العطس) ورشة سكر .. السكر مهم على فكرة وهو اللي بيدي المسقعة الطعم المسقعي اللذيذ.
  • الزغلول الكبير بقى .. شوية لحمة مفرومة معصجة. طبعاً ده للناس اللي تقدر عليها .. بتدي طعم حلو إنما برضه المسقعة بتكون حلوة وهي أورديحي .. مفيش مشكلة يعني .. خلينا نصّرف نفسنا ومنعقدهاش.
العمايل:
1.      نقشر البتشنجان – على رأي خالتي- ونغسله بالمايه بس من غير رغاوي وبعد كده نقطعه .. يا مكعبات كبيرة يا شرايح سميكة (1 سنتيمتر فقط لا غير). أنا عن نفسي هجيب المسطرة وأقيس بالضبط عشان البناء المعماري المسقعي يطلع كويس وميتهدش فوق نافوخي. نقليه ف الزيت اللي قلنا عليه من شوية لغاية أما لونه يغمق وتطلع الريحة الجميلة بالقوي.

2.      ننشل الباذنجان من الزيت – هي كده ننتشله يعني- ونصفيه على ورقتين مطبخ مستلفينهم من عند الجيران .. لازم تستلفي ورق المطبخ وإلا الطبخة تبوظ.

3.      الخلطبيتة بقى .. هنحط برطمان الصلصة والملح والفلفل والسكر وآيه كمان؟؟ أيوا .. البصل .. لحقتي تنسي البصل أبو دموع غزيرة. نحط ف حلة كل الكلام ده وع النار لغاية أما يبقلل/ يرتعش/ يغلي يعني ونوطي النار عليه حبتين كده نونو.

4.      الباذنجان بقى اللي نشلناه ده –واخدين بالكم يا ستات؟- هنحطه ف نفس الحلة 10 دقايق. أنا حذرت ومليش دعوة هما ال10 دقايق .. لا تزيد دقيقة ولا تنقص دقيقة. أنا حذرت ومليش دعوة باللي هيحصل بعد كده. إني أحملكن المسئولية كاملة.

5.      ننقلل بقى الحاجات الي كانت ف الحلة ف طاجن فخار/صينية/بايركس المهم أي حاجة بتخشي الفرن. ونحط ع الوش اللحمة المفرومة والخطوة ده بقى للقادرين فقط أو ف الأعياد. يقولك في ناس بتحط بشاميل ع الوش .. برضه فكرة جميلة. بعد كده ع الفرن عدل .. حرارة متوسطة (180 درجة) لغاية أما يحمر كده ويتسبك والريحة الحلوة تطلع منه.

6.      بعد أما نطلعه ممكن نجرنش (نزين يعني بس الشيفات بيقولوا كده) .. يا سلام بقى على شوية ترانشات فلفل حراق ولا فلفل ألوان ع الوش وأديله.

7.      أهم وأخطر خطوة ع الإطلاق وكليها لجوزك ولو مكنتيش متجوزة افتكري النصيحة ده عشان أما ربنا يعدلها لك وتتجوزي تطبقيها. أوعي تنسي الخطوة ديه.. فاكرة المسقعة اللي وكلتها سعاد حسني لحسين فهمي ف فيلم "موعد على العشاء" .. أعملي بقى زي مثلك الأعلى سعاد حسني. طبعاً مش هنقدر نذكر المكون السحري ده هنا عشان الرقابة على المصنفات الأكلية.

والعواف بقى يا ست عفاف.  


الرابط على صفحة دقة جديدة
العدد التجريبي ص. 22
http://www.daqahgadidah.com/wbp/dg/mag/index.html

هناك 16 تعليقًا:

salsabel salah يقول...

أسلوبك مش عارفه بجد يتقال عليه ايه
" عسول "
بس

heba atteya youssef يقول...

ههههههههههههههههههههههههههه

وصفة أكل .. مش متوقعه

بس احلي حاجه نتايجها زي سعاد حسني ما عملت ههههههههههههههههههههههههه

richardCatheart يقول...

هههههههههههههههههه انتى عسوله شربات وشطرة جدااااااااااااا ماشاء الله انا هتابعك على طوووووووووول

أحمد أحمد صالح يقول...

بصل في المسقعة ؟!
بأمانة أنا باعملها احسن من كدة!!
..لكن بأمانة و أمانة الاسلوب عجبني جدا جدا جدا !!
..في انتظار الطبخة الجاية !!

Bent Men ElZman Da !! يقول...

ههههههههههههههههههههههههه
انا حبيت اسلوبك نفسه
يفتح النفس اكتر من الاكله
تسلم ايدك :))

ميمونة يقول...

اسلوبك رهيب وحلو جداااااااااا
تحياتي
ميمي

نيسآان يقول...

تسلم الايادي
المسقعه لذيذه جدا
و اسلوب جميل وعفوي في سرد الوصفه ...بالتوفيق عزيزتي

Salma Hesham Fathey يقول...

عزيزتي سلسبيل،

ربنا يخليكي .. أنتي والله اللي عسولة جدا .. رأيك بسطني جدا :)

Salma Hesham Fathey يقول...

أختي العزيزة هبة عطية،

طبعا هي سعاد حسني دي أي حد .. إنها مثلنا الأعلى .. نياهاهاها

شكرا ليكي

Salma Hesham Fathey يقول...

Richardcatheart حبيبتي

أنتي اللي عسولة وشربات .. أنا يشرفني متابعتك ليا دايما

تسلميلي

Salma Hesham Fathey يقول...

العزيز المتابع دائما أحمد صالح

شكرا على ردك وأنك عجبك أسلوبي .. وبالنسبة للمسقعة كل شيخ بقى وله طريقته .. أنا وماما بنعملها بالبصل وطعمها بيبقى جميل.

ممكن لو حابب تحطلي وصفتك وأجرب أعملها برضه :)

شكرا ليك

Salma Hesham Fathey يقول...

حبيبتي بنت من الزمان ده،

مبسوطة قوي إن الطريقة عجبتك وفتحت نفسك وأتمنى تجربيها برضه بإذن الله ..

شكرا ليكي جدااا

Salma Hesham Fathey يقول...

حبيبتي بنت من الزمان ده،

مبسوطة قوي إن الطريقة عجبتك وفتحت نفسك وأتمنى تجربيها برضه بإذن الله ..

شكرا ليكي جدااا

Salma Hesham Fathey يقول...

تحياتي المعطرة بالورد ليكي ميمي ..

شكرا ليكي ومبسوطة جداااا إن البوست عجبك :)

Salma Hesham Fathey يقول...

تسلم الايادي
المسقعه لذيذه جدا
و اسلوب جميل وعفوي في سرد الوصفه ...بالتوفيق عزيزتي

اختي الجميلة نيسان ..

شكرا ليكي جدا وما تنسيش انك شجعتيني أحط الوصفة

كتير سعيدة إن طريقة السرد عجبتك :)

غير معرف يقول...

مشكورة على احلى مسقعة و انا بادور من زمان على مسقعة سعاد حسني